ပရီးမီးယားလိဂ်ချန်ပီယံဖြစ်သင့်တဲ့ အသင်းကို ထုတ်ပြောလိူက်တဲ့ မန်ယူဂန္ထဝင် ရွန်နီ
မန်ယူဂန္ထဝင်ကစားသမား ရွန်နီက ယခုရာသီတွင် အာဆင်နယ်အသင်းကိုပရီးမီးယားလိဂ်ချန်ပီယံ ဖြစ်စေလိုကြောင်း ပြောကြားခဲ့သည်။
အမေရိကန်မေဂျာလိဂ်ကလပ် ဒီစီယူနိုက်တက်အသင်းကို ကိုင်တွယ်နေသည့် မန်ယူတိုက်စစ်မှူးဟောင်း ရွန်နီက အမေရိကန်သတင်းဌာန CNN နှင့် တွေ့ဆုံရာတွင် အာဆင်နယ်အသင်းကို ပရီးမီးယားလိဂ်ချန်ပီယံဖြစ်စေလိုကြောင်း ပြောကြားခဲ့ခြင်းဖြစ်သည်။
ရွန်နီက “ကျွန်တော်ကတော့ အာဆင်နယ်အသင်းကို ပရီးမီးယားလိဂ်ချန်ပီယံဖြစ်စေချင်ပါတယ်။ ဒါပေမဲ့ မန်စီးတီးအသင်းက သူတို့ကို ကျော်နိုင်မယ်လို့ ကျွန်တော် ထင်နေတုန်းပါပဲ။ အာဆင်နယ်က ပရီးမီးယားလိဂ်မှာ ချန်ပီယံဆုအတွက် တိုက်ပွဲမဝင်ဖူးတာ အတော်လေးကြာပါပြီ။
ဒါကြောင့်ဖိအားတွေကိုသူတို့ခံနိုင်ဖို့မလွယ်ပါဘူး။ ရာသီ ကုန်ခါနီးအချိန်မှာ ဖိအားတွေက ပိုများလာတာပါပဲ။ အာဆင်နယ်အနေနဲ့ အဲဒီဖိအားတွေကို ဘယ်လိုကိုင်တွယ်မလဲဆိုတာကို ကျွန်တော် အရမ်းစိတ်ဝင်စားနေပါတယ်” ဟု ပြောကြားခဲ့သည်။
အာဆင်နယ်အသင်းသည် ၂၀၀၃-၀၄ ရာသီတွင် ပရီးမီးယားလိဂ်ချန်ပီယံဆုကို နောက်ဆုံးအကြိမ်ရရှိထားပြီး ပရီးမီးယားလိဂ်ချန်ပီယံဆုနှင့်ဝေးကွာနေသည်မှာ ၁၉ နှစ် ကြာမြင့်ခဲ့ပြီဖြစ်သည်။
